Претставникот на движењето „Движи-промени”, Саво Манојловиќ најави дека откажувањето од измените на Законот за референдум и повлекувањето на Законот за експропријација остануваат услов за прекин на еколошките протести кои ги блокираа патиштата во Србија последните две саботи.

Манојловиќ на Твитер објави три опции за најавените еколошки протести, во зависност од тоа што ќе одлучи владата.

– Доколку не се исполнат две барања – блокада на автопатишта три часа; Доколку исполнат едно барање – блокадата на автопатот трае еден час; Ако ги исполнат двете барања – ќе славиме на градските плоштади, без блокади на автопатиштата, напиша тој.

Претходно претседателот на Србија Александар Вучиќ најави дека е најдено решение за Законот за експропријација и дека ќе го соопшти вечерва во 18 часот.

Владата на Србија во пресрет на обраќањето на Вучиќ соопшти дека Вучиќ го вратил Законот во Собранието, а Владата го повлекува од процедура. Најавени се и измени на Законот за референдум.