Српската и кинеската полиција изведоа заедничка показна вежба
Припадниците на Министерството за внатрешни работи на Србија и специјалните полициски единици на Министерството за јавна безбедност на Кина денеска одржаа заедничка показна вежба.
На вежбата присуствуваат српскиот претседател Александар Вучиќ, министерот за внатрешни работи Небојша Стефановиќ, кинескиот амбасадор во Србија Чен Бо и директорот на БИА Братислав Гашиќ.
Се работи за показна тактичка вежба за управување со кризна ситуација, создадена како резултат на терористички акт чија цел е приказ на обученоста и подготвеноста за извршување на најсложени безбедносни задачи.
Во вежбата, во која ќе биде прикажано совладување и онеспособување на терористите и ослободување на заложници, учествуваат 180 припадници, 20 возила со различна употреба и три хеликоптери.
Своите вештини и способности ги покажуваат членови на специјалните полициски единици од провинцијата Хенан во Кина и членовите на српската специјална антитерористичка единица, жандармеријата, хеликоптерската единица, преговарачкиот тим на МВР и Управата на криминалистичката полиција.