Случајот со копањето на тунел во „Идризово“ се уште е во предистрага
„Предметот за копањето тунел во затворот Идризово се уште е во предистражна постапка“, потврдија денеска од Основното јавно обвинителство за РСЕ. Тунелот беше откриен во месец март кои бил предвиден за бегство на најмалку осум луѓе осудени на затворски казни од 10 години до доживотен затвор.
„Случајот се наоѓа во предистрага. Се постапува по предметот и дадени се насоки до Министерството за внатрешни работи. Ако се утврди инволвираност и на затворската полиција, во предметот ќе се вклучи и Одделението за истражување и гонење на кривични дела сторени од лица со полициски овластувања и припадници на затворската полиција од Основното јавно обвинителство за гонење организиран криминал и корупција“, велат од ОЈО ГОКК за РСЕ.
Во март годинава во затворот „Идризово“ откриен е тунел од шеталиштето на затворениот дел на затворот што води надвор од затворот, наменет за бегство на затвореници со високи казни. Тунелот бил со должина од околу 60 метри, а во него имало и потпорни греди. Тунелот се копал околу четири до пет месеци, а осветлувањето било решено со пуштен кабел и светилки. Од Министерството за внатрешни работи соопштија дека спречиле организирано бегство на група од најмалку осум луѓе осудени на затворски казни од 10 години до доживотен затвор.
ВИДЕО: Тунелот во „Идризово“ е долг 40 метри, затворениците спровеле и струја