Слободен печат најцитиран медиум во регионот и пошироко
Најтиражниот македонски дневен весник и најпосетуваниот портал „Слободен печат“, кој како медиум годинава одбележува 10 години од своето постоење, е медиумска куќа што е најцитирана во регионот, и чии содржини се преземаат и се пренесуваат како во, така и надвор од државата. Ваквиот показател лесно може да се утврди со проверка на интернет. Од нас се преземани тематски анализи, прилози и вести а пренесени од големите регионални медиумски куќи од рангот на Политика, РТС, хрватскиот „Јутарни лист“, Блиц, Танјуг, украинскиот сервис на Би-Би-Си, бугарската информативна агенција БГНЕС, и редица други влијателни медиумски куќи.
Токму во тој контекст, со задоволство констатираме дека колегите од регионалните медиумски куќи, многу поголеми од нашата, речиси секојдневно ги пренесуваат и ги цитираат анализите и темите што се обработуваат во „Слободен печат“, а се од сегментот на политиката, здравството, одбраната, економија, спортот итн.
Во низата цитати и повикувања на пишувањата во „Слободен печат“ вреди да се спомене и последниот случај со најстариот српски весник „Политика“ и неговиот интернет портал, кој презеде вест која беше споделена на Балканот а се однесува на пишувањата на нашиот медиум за скандалот на клиниката за Онкологија во Скопје. Оваа анализа на српскиот медиум беше споделена и прочитана неколку илјади пати како во регионалните медиуми така и во светските новинарски куќи. Информациите од нашиот портал се споделуваат експресно и во Б92, Танјуг но и други останати влијателни портали од соседството.
Ова во суштина претставува најдобар доказ и показател за професионалната ориентација и високите новинарски стандарди на нашата куќа. Нам ни се верува. Признанието е дотолку поголемо што доаѓа во време кога регионот и светот се соочуваат со глобалниот феномен на лажните вести, при што големите медиумски куќи точно знаат кому можат да му веруваат, чии содржини се точни, веродостојни и професионално обработени. Во таа насока наши текстови и анализи изминатиов период беа предмет на позитивна критика и одглас кај поголем број влијателни и сериозни медиумски куќи.
Дополнително, украинскиот сервис на „Би-Би-Си“ истакнат професионален препознатлив медиумски сервис, речиси секојдневно се повикува на пишувањата во „Слободен печат“ од кое вреди да се истакне и она последното околу македонската воена помош на Украина со тенкови и борбени воздухопловни летала. Темите и анализите од рубриките спорт и свет, константно се наоѓаат на првите страници од интернет-порталите на медиумите од соседството.
Во таа насока останувајќи и натаму цврсто на својата уредувачка политика и темелните професионални определби во своето работење, „Слободен печат“ потврдува дека ќе остане на принципите на професионалното новинарството и пред сè штитејќи го јавниот интерес на граѓаните на Македонија и во годините што ќе следуваат.