Се отстрануваат дрвја за изградба на градинката во Пролет, наместо нив ќе „никнат“ 20 јавори
Започна да се расчистува теренот каде, според најавите од Општина Центар, наскоро ќе започне изградбата на првата детска градинка во населба Пролет.
За таа цел, во наредните денови ЈП „Паркови и зеленило“ по налог на општината ќе отстрани 4 дрва, поточно две копривки, липа и софора, со кои ќе се ослободи простор и ќе се овозможи изградба на градинката. Дополнително, со помош на специјална механизација, ќе бидат пресадени уште 4 јасени во парцелата на која ќе се гради градинката.
На местото на отстранетите дрва, Општина Центар ќе засади нови 20 високо калемени садници од видот јавор (аcer campestre) и друг вид на средно и ниско зеленило кое на просторот околу објектот на градинката ќе му даде нова свежина и нов лик. По завршувањето на градежните активности поврзани со новата градинка, ќе се добие зелена површина на околу 2000 метри квадратни, со што општината ќе ја заштити животната средина, а овој простор ќе стане ново зелено катче во населбата Пролет – велат од Општина Центар.
Детската градинка, која наскоро ќе започне со изведба, е првата целосно нова градинка која ќе се гради во Општина Центар по повеќе од 50 години, прва воопшто во населбата Пролет, а децата од оваа населба, како што објаснуваат од локалната власт, ќе добијат нов, современ и квалитетен објект за престој, забава и другарување.
Градинката ќе се гради на вкупна бруто површина од 3276 метри квадратни, со што ќе биде една од најголемите детски градинки во државата.