СДСМ: Позитивно е што Мицкоски најавува дека ВМРО-ДПМНЕ се откажува од идејата за бојкот на пописот
Позитивно е што Христијан Мицкоски најавува дека ВМРО-ДПМНЕ се откажува од идејата за бојкот на пописот закажан за април оваа година и СДСМ тоа го поздравува, се вели во реакцијата на владеачката партија.
– Очекуваме дека разумот ќе преовладее кај сите и дека по цели 19 години, Република Северна Македонија ќе спроведе попис без мешање на политиката, согласно стандардите и праксите на Евростат и Обединетите Нации, нагласуваат од СДСМ.
Пописот е важна статистичка операција, истакнуваат социјалдемократите, за прибирање на целосни, точни и релевантни податоци кои се основа за градење на стратегии и политики за натамошен развој на државата, на економијата и на општеството.
– Секоја политичка партија има обврска пред граѓаните да ги поддржи процесите за државата и институциите да добијат точни податоци за структурата на населението и на домаќинствата, демографски податоци за општините и регионите, а тоа е возможно само со спроведен попис согласно сите меѓунардони стандарди, потенцираат од СДСМ.