Рецепт за мека штрудла со тиква и цимет
Десертите од тиква се меѓу најубавите есенски задоволства, а оваа година задолжително пробајте ја домашна штрудла од која ќе мириса убаво целата куќа.
Постојат многу начини како да ја употребите тиквата во кујната – таа е идеална состојка за многу јадења, од солени до слатки, одлична е во чорба, но сепак најубава како сочен фил во колачи!
Иако правењето штрудла понекогаш може да изгледа како да има многу работа, оваа верзија ќе ви се допадне бидејќи е брза, а резултатот е десерт за паметење.
Состојки:
За кората:
– 600 грама брашно
– половина коцка квасец
– 350 милилитри топла вода
– 6 лажици масло
– 3 лажици шеќер
– прстофат сол
За филот:
– 1,5 килограми тиква
– 3 лажици презла
– 300 грама шеќер
– цимет по вкус
За посипување:
– шеќер во прав по вкус
Подготовка:
Тиквата убаво измијте ја, исчистете ја и изрендајте ја што поситно. Потоа додадете околу 150 грама шеќер и ставете го на тивок оган, така што тиквата го ослободува сокот додека шеќерот се раствора. Потоа промешајте, додадете го преостанатиот шеќер и оставете го да се растопи со повремено мешање. Извадете и оставете да се излади, па додадете цимет и презла, повторно измешајте и оставете го на страна.
Во сад издробете една коцка квасец, истурете шеќер и малку топла вода и добро промешајте, па оставете го пет минути да се „активира“. Потоа додадете брашно, масло, вода и сол, па месете додека не добиете еластично тесто. Додадете брашно по потреба.
Потоа поделете на три дела за да добиете три штрудли.
Со сукало расукајте ги парчињата да не биде многу тенко, најмногу до 4 милиметри, па намачкајте го филот од тиква. Завиткајте во ролнички и печете околу 50 минути, во рерна загреана на 180 степени.
Откако ќе се испече, оставете ја штрудлата да се излади, па посипете со шеќер во прав и исечете.