Реакции во францускиот печат за извештајот на ЕК: Проширување на ЕУ – наскоро 29
Порталот на младите европјани, „Торијон” насловува „Проширување на ЕУ – наскоро 29″, нагласувајќи уште на почетокот дека „како што напредуваа различните бранови на проширување на ЕУ, наведената цел одговараше на обидот за обединување на европскиот континент, оваа политика покренува прашања и загрижености за нејзините крајни цели и корист”.
Според „Торијон”, унгарскиот комесар за проширување, Оливер Вархељ има тешка задача и ќе мора да успее во спроведување на политиката за проширување на ЕУ.
Тековната цел е да се продолжи со проширување на ЕУ со тоа што ќе се отвори за извесен број на земји. Така, пет земји се кандидати за влез во Европската унија – Црна Гора, Србија, Турција, Албанија и Северна Македонија. Последните две земји со кои ЕУ одлучи да ги отвори преговорите се Албанија и Северна Македонија. Францускиот претседател Емануел Макрон првично изгледаше дека сака да се спротивстави на отворањето на пристапни преговори со овие две земји, но конечно се предомисли откако доби измена во процедурите на ЕУ за проценка на апликациите од земјите-членки.
Северна Македонија, според „Торијон”, покажа добра волја за влез во ЕУ. Таа, всушност, се обиде да ги реши своите разлики со Грција, особено со промена на името на земјата и со додавање на географската ознака „Северна” покрај Македонија, за да го разликува од грчкиот регион Македонија.
Сегашните времиња бараат презентирање на јасен европски проект за идните проширувања на ЕУ. Инаку, според „Торијон”, европскиот проект, кој има слаба поддршка во рамки на европското јавно мислење, ризикува се повеќе и повеќе да напредува со тешкотии, па дури и во најлош случај да не успее, што би било катастрофа за иднината на европските народи. Но, ништо одржливо не може да се изгради без одобрение од народите во Европа. Ако ЕУ сака да влијае на светските работи во 21 век, важно е да се разјасни целта на европскиот проект.
Во врска со иднината на овие европски проширувања, важно да се разгледа апликацијата за членство на земјите од Балканот што произлегуваат од поранешна Југославија, кои остануваат целосно европски.
Во коментар на луксембуршки „Котидиен” насловен како „Игра на трпеливост”, се нагласува дека Европската унија го продолжува својот сон за обединување на сите земји на континентот. Денес Албанија, БиХ, Косово, Србија, Северна Македонија и Црна Гора работат за членството во Унијата. Но, патот ќе биде долг.”
– Балканот беше обележан со војните што се случуваа за време на распадот на Југославија во текот на 90-тите години. Дваесет години подоцна, оружјата замолкнаа, но недовербата понекогаш е силна помеѓу различните заедници. Но, Европската унија го има барем тој талент: здружување на поранешните противници, на поранешните „наследни” непријатели, за промовирање на заедничка мирна судбина. Земјите основачи стигнаа таму пред повеќе од 60 години. Тешкотијата ќе биде голема за овие земји-кандидати, но надежта дека можат да стигнат таму е многу жива, се вели во коментарот на „Котидиен“.
„Котидиен“, за жал, констатира дека ова проширување кон Балканот загрижува и во рамките на Унијата од аспект на сè уште постоечките меѓуетнички тензии, криминалот, прекумерната сиромаштија, политички немири, итн. Некои земји веруваат дека ЕУ се движи пребрзо во овој регион. Пред една година, Франција дури рече „не” за отворање на преговорите за пристапување кон Европската унија на Албанија и Северна Македонија со што беа туширани надежите на сите останатите земји.
Весникот на француски јазик од Луксембург, понатаму додава дека „се креваат и други гласови кои покажуваат со прст кон релативниот неуспех на проширување на исток од Европската унија. Земји како Полска и Унгарија покажаа мала солидарност за време на мигрантската криза. А што е со предупредувањата издадени од Брисел до Варшава и Будимпешта во врска со почитувањето на владеењето на правото? – ЕУ сакаше да оди премногу брзо со Источна Европа, можеби тоа треба да потрае малку повеќе време со земјите од Западен Балкан за да се избегнат нови недоразбирања и нови кризи.”