Позната српска водителка пронајдена мртва во стан во Белград: Обвинителот нареди обдукција на телото
Српската водителката Бојана Јанковиќ (поранешна Николиќ), која се прослави како водителка на култното шоу „Сити“ на Пинк телевизија е пронајдена мртва во стан во Белград, пренесуваат српските медиуми.
За нејзината смрт е известено Вишото јавно обвинителство во Белград, кое веднаш нареди обдукција. Сè уште не е позната причината за смртта на познатата водителка, но според информациите на телото нема видливи траги на насилство.
Неофицијално, итната помош ја констатирала смртта на Бојана околу 19 часот. Телото на познатата водителка е пренесено во Институтот за судска медицина.
Се огласи и семејството за да ја потврди веста за нејзината ненадејна смрт, пренесуваат медиумите.
„Семејството потврдува дека Бојана денеска ненадејно почина и иако разбираат дека таа е интересна личност за медиумите, ги повикуваат сите медиуми да се однесуваат според нивната етика, да ја почитуваат својата колешка и да го остават семејството да ги поминат овие тешки моменти во мир“, се наведува во соопштението на семејството.