Потсекретарот на италијанската економија поднесе оставка поради коментарот за Мусолини
Потсекретарот на италијанската економија поднесе оставка откако предизвика вознемиреност со изјавата дека паркот во неговиот роден град треба да се преименува по братот на фашистичкиот диктатор Бенито Мусолини, пренесува Ројтерс.
Клаудио Дуригон, член на десничарската партија, претходно месецов изјави дека неговата партија се обврзала да го врати првобитното име на паркот во Латина, град со околу 120.000 жители во централна Италија, на Арналдо Мусолини.
Паркот беше преименуван во 2017-та година во знак на сеќавање на Џовани Фалконе и Паоло Борселино, двајца врвни судии против мафијата, кои беа убиени од сицилијанската мафија во 1992. Латина е основана во 1932-та година за време на фашистичкото владеење и е поврзана со Мусолини.
Со оглед на тоа што контроверзноста не покажува знаци за намалување, Дуригон поднесе оставка во четвртокот вечерта, признавајќи дека направил грешка и се извини на семејствата на жртвите на мафијата.
„Јас не сум, и никогаш не сум бил фашист“, рече тој во изјавата.
Лидерот на партијата Матео Салвини му се заблагодари на Дуригон што се повлече и стави до знаење дека ќе остане во Лигата.