Ќофтињата се едно од јадењата кои секогаш се добредојдени на македонската трпеза и кои ќе го задоволат непцето и на најпребирливите.

Домаќинките најчесто ги прават од мелено месо, но можеби е време да пробате нешто поинакво.

Понекогаш е добро да се направат мали промени, а ќофтињата од риба се идеална замена за оние од говедско или свинско месо, особено во деновите на постење.

Состојки:

– 1 кг бела риба или друга риба по избор
– 1 црвена пиперка
– 1 главица кромид
– 2 чешниња лук
– 100 гр презла
– ¼ стар леб
– 200 мл сос од домати
– сол, бибер
– зачини по вкус

Подготовка:

Во тенџере сипете вода, додадете една лажица сол, па ставете ја рибата да се вари 15 минути. Кога ќе биде готова, исчистете ја од коските и кожата, па сомелете ја.

Пиперката, кромидот и лукот исецкајте ги на коцки.

Во загреана тава сипете масло, додадете го кромидот, пиперката и малку вода, па сѐ динстајте 10 минути, а потоа додадете ја рибата и измешајте сè заедно.

Потоа, во тавата додадете лук, сол, бибер и зачини по вкус. Лебот исечкајте го колку што можете поситно, па додадете го во тавата.

Сипете околу 50 мл вода и додадете ја презлата. Сѐ заедно промешајте и пржете уште пет минути.
Смесата оставете ја да се излади, а потоа од неа направете ќофтиња.
Во загреаната тава сипете малку масло, па спуштете ги ќофтињата и пржете ги додека не добијат златна боја.

Намалете ја температурата на минимум, а потоа прелијте ги ќофтињата со сок од домати и варете пет минути.

Ќофтињата послужете ги со вашата омилена сезонска салата.