Поради немање услови дислоцирани неколку избирачки места во Кавадарци
Дислоцирани се неколку избирачки места во Кавадарци, а има и измени во влезови на некои од местата за гласање пред претстојните предвремени парламентарни избори. Ова попладнево на прес-конференција го соопшти Зоран Костов, претседател на Општинска изборна комисија.
-Најзначајните измени се однесуваат на дислокација на неколку избирачки места каде нема услови за спроведување на гласање, според препораките за однесување во услови на пандемија, информираше Костов.
Промените ќе бидат соодветно обележани и на самите локации, каде ќе се постават табли со патокази, за насоката по која треба да се движат гласачите.
Костов апелираше до гласачите да се почитуваат препораките за заштита како превенција од коронавирусoт, да се носат заштитни маски и да се држи дистанца пред местата за гласање. Нагласи дека на сите влезови во избирачки места ќе има средства за дезинфекција, ќе се почитуваат гласачките протоколи и додаде дека очекува на денот на гласањето да нема никакви проблеми.