Поништени пресудите против поранешниот бразилски претседател: Да Силва може повторно да се кандидира
Судија на Врхопвниот суд во Бразил нареди поништување на сите обвинителни пресуди за корупција на поранешниот претседател Луиз Инацио Лули да Силва со што се отвора пат да биде можен противкандидат на Жаир Болсонаро на претседателските избори во 2022 година.
Денешната одлука на судијата Едсон Факин одекна како бомба низ Бразил, тврдејќи дека судот во Коритиба што го осуди Да Силва во четири процеси бил ненадлежен за такви случаи.
Тие процеси сега ќе ги води сојузниот суд во Бразилија, па во исчекување на пресудите, се враќаат политичките права на Да Силва.
– Лула е недолжен, е напишано на Твитер профилот на Работничката пратија што Да Силва ја основа во 1980 година.
Тој одлежа 18 месеци во затвор, од април во 2018 година до ноември во 2019 година, по што беше ослободен врз основа на колективна одлука на Врховниот суд без можност да се кандидира.
Но, сега, според едно неодамнешно истражување, важи како единствен кандидат кој може да го победи Болсонаро на изборите догодина. Според резултатите, 50 отсто од анкетираните би гласале за Да Силва наспроти 44 отсто за Болсонаро.