Почна прикажувањето на филмот „М“ на Вардан Тозија во кино салите низ државата
Дистописката приказна за осамено момче од шумата, кое наидува на низа предизвици и авантури, барајќи ја својата самовила, ќе го има своето премиерно киноприкажување на 5 октомври во „Синеплекс“. По премиерната проекција на филмот „М“ на Вардан Тозија публиката ќе може да го погледне во кино салите во Скопје и во останатите градови низ Македонија.
– Од колку слоеви и да е изградена приказната, темата е секогаш базична. Секогаш постои мал зрак светлина што нѐ води низ најмрачните лавиринти. Никогаш не е доцна да се обидеме да го вратиме светот кој дозволивме да ни се уништи. Од 5 октомври, филмот ќе се прикажува во сите кина кои се на располагање на домашната публика. За жал, ги нема многу – вели Тозија.
Сценариото е на Вардан Тозија и Даријан Пејовски, продуценти се Дарко Попов и Вардан Тозија, а филмот е работен со копродуценти од Франција, Хрватска, Косово и Лукембург.
Актерската екипа ја сочинуваат Матеј Сиваков, Сашко Коцев, Александар Ничовски, Камка Тоциновски, Бојана Грегориќ Вејзовиќ, Верица Недеска, Владимир Тулиев, Оливер Митковски, Мирослав Петковиќ, Жаклина Петровска, Благоја Веселинов, Борис Дамовски, Јамина Билаловиќ, Михајло Миленковски и Тони Михајловски.
Кинематографер е Владимир Самоиловски, костимите се дело на Андреа Кустовиќ и Николина Костаншек, музиката е на реномираниот филмски композитор Натаниел Бергес (Nathanaël Bergèse) во соработка со францускиот копродуцент „Les Contes Modernes“.
Филмот е поддржан од Агенцијата за филм, Хрватскиот аудиовизуелен центар, Косово филм центар, SACEM (Франција) ТВ Телма (Македонија), „Агора“ копродукциски маркет на ИФФ „Тесалоники“ (2019), „ScriptTeast 2020 – Script Development Workshop“ (Полска, Германија, Франција), „Софија митингс“ (WiP) на ИФФ Софија (2020).