Македонското скијање остана без една од најважните и најзначајните личности во историјата, на 74-годишна возраст, почина претседателот на Скијачка федерација на Македонија, Владимир Пановски.

Во Скијачката федерација Македонија беше активен од 2002 година, како долгогодишен потпретседател, а од 2018 година и претседател на федерацијата.

Тој беше врвен спортски работник, вљубеник во скијањето и воопшто во спортот, и има многу заслуги за напредокот на скијањето во Македонија, особено во обезбедувањето квалитетна соработка со меѓународните скијачки федерации, ФИС и ИБУ, со Македонскиот олимписки комитет, со Агенцијата за млади и спорт на Македонија.

Пановски се залагаше за омасовување и за што поквалитетна работа со младите, надежни скијачи во Македонија, како и за напредокот на стручните кадри.