Македонската пејачка Калиопи вчеравечер го одложи концертот во салата „МТС“ во Белград, откако на една жена во публиката ѝ се слоши и за жал почина.

Пејачката се огласи на својот инстаграм-профил каде изрази сочувство на семејството на починатата жена и потенцираше дека ова ќе биде нејзина прва и единствена изјава за вчерашниот настан.

„Ова е најтажниот ден во мојата кариера…Денес наместо да го славиме животот на мојот концерт,загубивме еден живот…Во мое име и во име на целиот мој тим, изразуваме длабоко сочувство до семејството на починатата…Ова е моја прва и единствена изјава за вечерашниот немил и многу тажен настан за сите нас…Се надевам дека мојата публика ќе има разбирање за одложувањето на вечерашниот концерт…Новиот датум ќе биде објавен наскоро“, напиша Калиопи.

Во меѓувреме се огласија и организаторите на концертот на Калиопи кои преку јавно соопштение накратко информираа дека концертот е одложен, а новиот датум дополнително ќе биде објавен.

„Поради непредвидени околности концертот на Калиопи закажан за вечерва се одложува, а новиот датум на концертот ќе биде објавен подоцна. Сите купени влезници за вечерашниот концерт ќе важат и за новиот термин. За подетални информации во најкраток можен рок ќе биде објавено соопштение за медиумите кое ќе биде достапно на веб-страницата како и на социјалните мрежи на Салата. Ви благодариме за вашето разбирање!“, напишаа во соопштението.

Калиопи прекина концерт во Белград откако почина жена во публиката