Портпаролот на Кремљ, Дмитриј Песков тврди дека претседателот на Русија, Владимир Путин многу страдал и бил потресен од терористичкиот напад во Москва.

„Шефот на државата е многу загрижен поради ваквите трагедии. Верувајте, дури и да не гледате солзи на неговото лице, не значи дека не страда. Малку е веројатно дека некој знае и разбира низ што поминува, вклучително и вие и јас“, рекол Песков.

Откако на 22 март вооружени напаѓачи убија 144 луѓе, ранија 551 и ја запалија концертната сала, одговорноста ја презеде џихадистичката група Исламска држава.

Путин зборуваше за тоа следниот ден, а во понеделникот само кажа дека напаѓачите се „радикални исламисти“, но руските власти ја обвинија Украина и нејзините западни сојузници дека помогнале во нападот, што Киев и неговите сојузници остро го негираа.

Минаната сабота, американски, европски и дипломати од африканските и латиноамериканските земји положија цвеќе на местото на нападот и оддадоа почит со едноминутно молчење, објави Риа Новости.