Фудбалската репрезентација на Македонија вечерва доживеа убедлив пораз од 0:3 од Грузија, а пеколниот ритам во Лигата на нации од четири натпревари за десет дена го зеде данокот, стандардните Елиф Елмас и Александар Трајковски заработија повреди.

Селекторот Благоја Милевски смета дека распоредот е нехуман бидејќи тешко може да се издржи да се одиграат четири натпревари за десет дена и тоа веднаш откако заврши сезоната во европските лиги.

– Елмас се пожали на болка во препоните, исто и со Трајковски. Милан Ристовски морав да го заменам поради истоштеност, сакав и Барди да го заменат, но тој одби и сакаше да го доигра натпреварот. Не е хумано да се играат четири натпревари за десет дена, невозможно е во овој период да останете во натпреварувачка форма. Јас не можам ништо да им замерам на фудбалерите, зашто тоа се истите кои ја победија Ерменија со 5:0, како и Италија со 1:0. Само се надевам дека после ова сите ќе се здрави, дека ништо нема да биде сериозно, бидејќи зашто ќе ги чекаат подоготовки за новата сезона – рече Милевски.