Пред ручекот, во текот на мисата на Плоштадот Свети Петар, папата Франциск ја критикувал незаинтересираноста на општеството за сиромашните, како и опседнатоста со „моменталното“ постигнување на целите, пренесува Франс прес.

“Ние забрзано го следиме својот пат, и не се грижиме што јазот се зголемува, што алчноста на неколкумина ја отежнува бедата меѓу повеќето”, рекол Франциск.

Тој кажал дека сите кои се во подобра имотна состојба не би требало да се чувствуваат непријатно поради сиромашните, туку би требало да им помогнат колку што можат повеќе.

Папата потоа им се придружил на сиромашните и бездомниците на ручекот во големата ватиканска сала, по повод Светскиот ден на сиромашните.

На менито имало лазања, пилешко со сос од печурки и компир, десерт, овошје и кафе.

Десетина волонтери помагале во носењето на сиромашните во Ватикан и служењето на ручекот.

Папата се заблагодарил на медицинскиот тим кој пружа бесплатна здравствена заштита за сиромашните во Ватикан.