Пандемијата го процвета канабисот во Холандија: Немаат што да прават, па пушат
Продажбата на канабис во Холандија достигна рекордно ниво, главно како последица на честите изолации како мерки против ширењето на ковид-19.
– Пандемијата е добра за нас. Единствените што се среќни од мерките се угостителските објекти што продаваат марихуана – вели за Франс прес Кармелита, сопственичка на кофишопот „Но лимит“ во Хаг. Таа објаснува дека пред пандемијата во кофишопот имало по 350 купувачи на ден, а сега ги има по близу 500.
Кога лани во март во Холандија беше воведено првото ограничување за движење, лицата што користат марихуана панично тргнале во „кофишоповите“ – продавниците со лиценца да продаваат канабис. Но, поради можноста да продаваат канабис „за носење“, воопшто не се намалил бизнисот на кофишоповите, за разлика од рестораните и ноќните клубови, кои останале затворени.
– Порано луѓето одеа во дискотеки, а сега, кога сѐ е затворено, остануваат дома и пушат повеќе – вели сопственичката на „Но лимит“, еден од триесетте кофишопови низ Хаг.
Студија на Институтот Тримбос за истражувања за ментално здравје и зависности покажува дека 90 отсто од холандските корисници на канабис пушат марихуана подеднакво или повеќе во споредба со времето пред пандемијата.
– Тоа не е поради желбата да се препушат за да побегнат од реалноста. Повеќе е начин на луѓето да се носат со секојдневните тегоби – вели историчарот Стивен Снелдерс од Универзитетот на Утрехт.
Абдел Санхаџи, претседател на здружението на хашки трговци со канабис, изрази надеж дека пандемијата ќе поттикне и измени во законските одредби за да биде надминат парадоксот – продажбата и конзумирањето марихуана во Холандија се легални, но незаконски се одгледувањето и трговијата на големо.
– Сѐ што правиме е илегално, освен што плаќаме данок – објаснува Кармелита.