Илјадници Палестинци по тринеделна пауза повторно се собраа на протест долж израелската гранична ограда поставена на границата со појасот Газа, пренесуваат медиумите.

Министерството за здравство на оваа палестинска територија соопшти дека четири лица се ранети со израелска боева муниција за време на демонстрациите на неколку локации во близина на границата.

Исламскиот екстремистички Хамас кој владее во Газа ги прекина протестите кои се одржуваа еднаш неделно уште од крајот на март минатата година, по краткотрајниот прекуграничен судир со израелската војска. Овој судир беше предизвикан од целниот напад на командирот на помалата, но значително порадикална организација Исламски џихад.

Демонстрациите денес се обновени, додека лидерите на Хамас и Исламски џихад во Каиро преговараат со екипетските посредници за воспоставување на прекин на огнот со Израел, со надеж да се ублажи израелската блокада врз појасот Газа која трае веќе 12 години.