Боракс долго време е дел од многу домаќинства како средство за чистење и засилувач за детергент за перење алишта.

Сега, промоцијата на таа „хемија“ се шири преку социјалните мрежи, а некои ја промовираат како нешто што ќе ви го подобри здравјето.

Лекарите овој нов тренд го сметаат за крајно опасен.

„Како лекар, јасно и категорично ви велам, никогаш не пијте и не јадете боракс во која било количина“, рекла д-р Џенифер Аштон за „Еј-би-си њуз“.

„Тоа е токсин. Тоа е отров“, додала таа.

Луѓето кои ги споделуваат овие информации на социјалните мрежи предлагаат бораксот да се пие или да се јаде како додаток на јадењата, а кој наводно може да помогне да се намалат воспаленијата и да се прочисти телото.

Д-р Аштон истакнува дека бораксот не само што е штетен туку и непотребен, бидејќи телото има свои методи на природно прочистување.

„Нашата кожа, белите дробови, бубрезите, дигестивниот тракт и црниот дроб постојано го прочистуваат телото“, рекла д-р Аштон.

„Телото е исклучително паметно кога станува збор за физички механизам и чистење, така што всушност не ви се потребни никакви додатоци за тоа“, рекла таа.

Аштон додала дека навиките како вежбање, исхрана, внесување вода и пушење може да ги зголемат или намалат воспаленијата во телото.

„Треба да се фокусираме на здрави навики ако сакаме да го намалиме воспалението и да го подобриме здравјето“, рекла таа.

Кога станува збор за трендот на консумирање на боракс за да се намали воспалението, Аштон истакнала дека „ризикот е значителен, а корист речиси нема“.

Изложеноста на боракс – комбинација од борон, натриум и кислород – може да доведе до симптоми како што се иритација на очите, отежнато дишење, кашлање и крвавење од носот, според американскиот Центар за контрола и превенција на болести (ЦДЦ).

Доктор Дарен Сатон, лиценциран лекар за итна медицина, исто така, напоменува дека високите нивоа на консумирање боракс може да предизвикаат откажување на бубрезите, затајување на бубрезите и смрт.

„Симптомите можат да започнат како гадење, повраќање, дијареја“, рекол Сатон и додал:

„Можам да разберам како бораксот може да изгледа многу невин и безопасен, но во реалноста тоа навистина не е, особено ако имате некој поголем ризик за кој можеби не сте свесни додека не завршите во итната служба“.

Сутон заклучил и нагласил дека е важно да се проверуваат изворите кога станува збор за здравствени совети на социјалните мрежи.