Одличен деликатес за сите сетила: Торта со моркови од Дијана Иваноска
Животот навистина може да биде беспрекорно „вкусен“, а тоа го потврдува и Дијана Иваноска од Тетово, која со својот талент за комбинација на вкусови нè носи на едно исклучително гастрономско патување.
Иваноска стои зад инстаграм-профилот „Dash of Spice“ и ни ги открива малите тајни за создавање магија од вкусови. Своите рецепти почнала да ги споделува со своите следбеници и пријатели од почетокот на пандемијата.
„Го сакам секој дел од процесот, но најмногу уживам во фотографирањето на храната“, ни открива Дијана.
Инвентивната Дијана денеска споделува рецепт за едно гастрономско уживање – торта со моркови.
„Торта со моркови – сочна и крцкава во исто време, комбинирана со крем од крем-сирење и слатка павлака, превкусна. Оваа количина е за еден слој торта во калап 26 см. Јас ја печев во куглоф, може и во калап за леб. Ако сакате торта со два слоја, удвојте ја количината“, порачува Дијана.
Состојки за тесто:
– 130 г брашно
– 1 лажиче сода-бикарбона
– 1/4 лажиче сол
– 1 лажиче цимет
– 140 мл масло
– 100 г шеќер
– 90 г кафеав шеќер
– 1 лажиче ванила екстракт
– 2 јајца
– 150 г рендан морков
– 50 г сечкани ореви или други јатки
Состојки за крем:
– 120 г крем-сирење
– 70 г шеќер во прав
– 100 мл слатка павлака (хопла)
Подготовка:
Загрејте ја рерната на 175 степени Целзиусови.
Калапот во кој ќе печете премачкајте го со путер или обложете го со хартија за печење.
Измешајте го брашното со содата, солта и циметот.
Во друг сад измешајте го маслото со шеќерот и ванилата. Додајте ги јајцата едно по едно и измешајте убаво.
Додајте ги сувите состојки на трипати со мешање помеѓу секое додавање.
На крај измешајте ги морковите и оревите во смесата.
Печете 35 до 45 минути, во зависност од вашата рерна. Боцнете со чепкалка во средината на тортата, ако е сува готова е.
Изматете го крем-сирењето со шеќерот. Додајте ја слатката павлака и матете додека се згусне кремот.
Изладената торта филувајте ја со кремот.
Пријатно!