Од отворање на градинките досега: Регистрирани 15 случаи на ковид-19 кај деца и 44 кај вработени
Од отворање на градинките, на 9 септември до денеска, се регистрирани 15 деца и 44 вработени со позитивни резултати на коронавирус. Во моментот 44 вработени и околу 190 деца се наоѓаат во изолација, информира денеска министерката за труд и социјална политика Јагода Шахпаска.
Според информации од епидемиолозите, децата инфекцијата не ја стекнале туку ја носат од своите домови.
– Здравствената состојба на сите нив е добра. Голем дел од нив се излезени од изолација, голем дел и од воспитувачите и негувателите завршиле со изолација и се враќаат на своите работни места, рече министерката.
Таа додаде дека Владата и надлежните институции будно ја следат состојбата, бидејќи како што рече здравјето на сите граѓани во моментот е нивен приоритет.
Министерката Шахпаска рече дека за тоа кој ќе оди во изолација по регистриран случај на позитивен на коронавирус одлучуваат епидемиолозите врз основа на епидемиолошка анкета.
– Не е изненадувачки доколку некој воспитувач или негувател е позитивен во изолација да одат и цели групи до 15 деца, бидејќи во групите од три до шест години има до 15 деца, рече министерката.
Во врска со информациите за позитивни случаи на вработени и поголем број деца во изолација во градинката „Росица“ во Карпош, Шахпаска појасни дека тоа е градинка со три објекти и бројката од 44 изолирани деца е вкупна бројка од трите различни објекти.