Од граничните премини вратени 14 лица, МВР ги советува вратените со стар пасош да бараат писмено објаснување
Министерството за внатрешни работи ги советува граѓаните што се вратени од границите на државата со стар пасош да бараат писмено објаснување зошто се вратени.
– Ги информираме оние граѓани кои ќе бидат спречени од страна на граничните полициски службеници да направат излез од државата поради тоа што поседуваат патна исправа со името Република Македонија, дека можат да побараат писмено известување во кое ќе бидат наведени причините поради кои се оневозможени да направат излез – соопшти МВР.
„Слободен печат“ ја праша полицијата колкумина граѓани се обидоа да излезат од Македонија со стар пасош со Република Македонија на 12 февруари, денот кога стапи на сила рокот до кога важат старите патни исправи.
– Ве информираме дека во последните 24 часа на 14 лица на граничните премини при излез им е укажано дека не може да патуваат со патни исправи во кои стои старото уставно име – одговорија од МВР.