Карен Грин добила Ајфон во 2007 година, но направила нешто што повеќето луѓе не би го направиле – таа никогаш не го отворила. Нејзиниот телефон од првата генерација на Ајфон бил продаден на аукција за 63.356 долари во неделата, пренесува „Би-би-си“.

Оваа цена е за стопати повисока од оригиналната на телефонот со 8 гигабајти од 599 долари.

„Да се ​​открие оригинален модел од 2007 година, со прво издание, сè уште сосема нов со недопрена фабричка заптивка, е навистина извонредно“, изјави за „Би-би-си“, Марк Монтеро од „ЛЦГ Аукции“.

Пријателите ѝ го дале телефонот од 8 гигабајти како подарок во 2007 година, кога се вработила, рекла таа во интервју во 2019 година. Грин штотуку купила друг телефон, па го задржала подарокот без да го отвори.

„Тоа е Ајфон, си рекла таа, „така што никогаш нема да застари“.

За нејзина среќа, таа погрешила. Нејзиниот Ајфон е токму оној кој го бараат колекционерите, вели Монтеро.

„Само сосема нови, неотворени од првата генерација во одлична состојба се вредни“, вели тој. Приказната на Грин е „само шлаг на тортата“.

Познато е дека лојалните ентузијасти на „Епл“ плаќаат добри пари за оригиналните производи. Минатата година, раниот прототип на компјутерот на „Епл“ од 1970-тите бил продаден за над 677.000 долари.

Првата генерација на Ајфон, во слична чиста состојба, се продавал и претходно – еден за 35.414 долари во август и друг за 39.339 долари во октомври.