Еден од најконтроверзните и најинтересни ликови во тенисот, Австралиецот Ник Кирјос, не издржа да не се пошегува со Јаник Синер, кој во неделата го освои својот прв грен-слем трофеј во кариерата, на Австалија опен.

– Јаник, браво, грен-слем шампиону. Прашањето ми е колку треба да ти платам за да ми станеш тренер и јас да освојам грен-слем? – се интересираше Киријос.

Италијанецот беше џентлмен во својот одговор кон Кирјос.

– Тешко прашање. Она што е сигурно е дека им недостигаш на сите. Ти си играч што не се гледа често. Твојот стил на игра, начинот на кој се однесуваш на теренот се различни и ни требаат такви играчи. Се надевам дека ќе се вратиш. Ми недостигаш. Се надевам дека ќе се видиме повторно што е можно поскоро. И тогаш си потенцијален грен-слем шампион, мислам дека го знаеш тоа – возврати Синер.

Останува да видиме кога Австралиецот ќе се врати на терените. За потсетување, тој има одиграно само еден натпревар (во јуни 2023 година) од октомври 2022 година!

Инаку, Кирјос има грен-слем титула и тоа на Австралија опен, но во дубл, кога во 2022 година со Танаси Кокинакис победија во финалето.