Нема ништо поубаво од тоа да се зборува на мајчиниот јазик, порачуваат Македонците од Албанија
По повод одбележувањето на Меѓународниот ден на мајчиниот јазик, 21 февруари, Македонското друштво „Илинден” – Тирана упати честитка до припадниците на македонското национално малцинство во Албанија, како и до сите Македонци ширум светот.
„Негувањето на мајчиниот македонски јазик значи јакнење и зачувување на националниот и културен идентитет, со што нашите деца ќе бидат воспитани соодветно да ги негуваат своите национални, културни и верски традиции“, пишува во честитката.
Оттаму го нагласуваат и значењето на образованието на мајчин јазик, бидејќи, како што велат, тоа е најважниот сегмент во негувањето на основните обележја на еден народ.
„Нема ништо поубаво од тоа да се пишува, твори и зборува на својот мајчин јазик. Јазикот е непресушен извор кој треба постојано да се негува и пред сè да се зачува чистината на убавиот македонски збор”, пишува во честитката потпишана од претседателот на друштвото“, Никола Ѓурѓај.