Нема Бугарин што не сака Македонија да ја види во ЕУ, вели историчарот Спас Ташев
Бугарскиот историчар Спас Ташев изјави дека секое зближување со Македонија е позитивно и тоа мора да се поздрави.
Според него, моментално сме во фаза на чекање за да ги видиме резултатите, односно дека сѐ е во доменот на добрите желби. Ташев претстојното транспортно поврзување меѓу Софија и Скопје го оцени како позитивна политика. Историчарот потенцира дека во разговорите со Македонија треба „да се отворат практично сите теми“.
-Ова е промена и надградба на бугарскиот пристап за да се создаде нова клима на доверба. Софија има интерес еднаш засекогаш да ги реши проблемите и тешко дека има бугарски државјанин кој е против фактот Македонија да стане членка на ЕУ, нагласи историчарот. За тоа, сепак, мора да се отстрани говорот на омраза и бугарските граѓани во Македонија да имаат еднакви права со другите, вели тој.
Ташев посочува дека доброволното одвојување од минатото би било корисно дури и за Бугарија да даде пример со своето минато.
-Ние велиме дека Скопје не раскинало со комунистичкото наследство, но јасно е дека и ние имаме такви проблеми, додава бугарскиот историчар.