Премиерот на Израел, Бенјамин Нетанјаху, престана да се ракува за време на неговата изборна кампања, што се смета за сигнал дека расте загриженоста меѓу израелските официјални лица од избивање на епидемија на коронавирусот.

За време на денешната посета на светилиште во Хеброн, изрелскиот премиер е снимен како одбива да се ракува со луѓето кои ги сретнал во градот на Западниот брег, пренесе „Тајмс оф Израел“.

Снимката ја објави телевизијата Кан, шест дена пред националните избори.

תיעוד: נתניהו מסרב (בנימוס) ללחוץ ידיים לנוכחים במערת המכפלה בשל החשש מנגיף הקורונה pic.twitter.com/rb9kCInUMs

— מיכאל שמש Michael Shemesh (@shemeshmicha) February 24, 2020

На снимката може да се забележи како некој во светилиштето му пружа рака, а тој не возвраќа. Се слуша гласот и на еден од неговите советници кој вели: „Нема ракување“.

Малку засрамениот Нетанјаху се поклонува и вели „намасте“, што е вообичаен поздрав за хиндуистите.

Се слуша гласот и на сопругата Сара, која рече дека одлуката за воздржување од ракувањето е инструкција од владата.

Меѓутоа, извори блиски на кампањата на Нетанјаху рекоа за весникот „Тајмс“ дека тој сам ја донел таа „одговорна одлука“, бидејќи секојдневно се среќава со илјадници активисти пред изборите закажани за во понеделник.

Освен Нетанјаху, многу други израелски официјални лица презмеаа мерки за заштита од вирусот кој брзо се шири, па така некои од нив не присуствуваа на состаноци, а други одлучија да ги откажат и ограничат патувањата во и од Кина, Јужна Кореја, Јапонија, Хонгконг, Макао, Сингапур и Тајланд.