Националното координативно тело за имплементација на Конвенцијата на ООН за правата на лицата со попреченост при Владата направи анализа на Нацрт-концепцијата за основно образование и при тоа ги консултираше своите членови и партнери – организациите на лица со попреченост, соопшти владината прес-служба.

Нацрт-концепцијата била разгледана и анализирана на втората одржана седница на Националното координативно тело од 30 декември лани, при што тоа даде поддршка и писмено се обрати до Министерството за образование и наука, со свои коментари и сугестии по истата.

– Во соопштението од Националното координативно тело се потенцира дека, содржината на Нацрт-концепцијата ја анализираше преку принципите и начелата на Конвенцијата за правата на лицата со попреченост, преку статусот, развојот и унапредувањето на образовните можности на ученците со претстојните концептуални промени, како и преку генералниот аспект на унапредување на образованието во државата воопшто, како процес кој со децении концептуално стагнирал, наведува владината прес-служба.

Покрај образложение за аспектите на поддршка и потребата од носење на ваквата Концепција, Националното координативно тело предложило и неколку сугестии.

Прво сите политики и акти кои ќе произлегуваат од новата Концепција да се повикуваат и консултираат со Конвенцијата на ООН за правата на лицата со попреченост, како и препораките кои произлегуваат од неа, потоа осигурување и продолжување со заложбата за обезбедување на аспектот на пристапност и универзален дизајн, како предуслов за инклузивност и  можностите за образование пристапно до секој ученик.

Една од сугестиите е и обезбедување учество и вклученост во креирањето и реализацијата на сите репрезентативни организации на лицата со попреченост, како и организациите на родителите на децата со попреченост, како исклучително важен предуслов, каде преку квалитетот на взаемната соработката во носењето, би се рефлектирал и во квалитет во реализацијата. Потреба од персонално докомплетирање и неопходно обучување на стручните служби од аспект на методолошки пристап во инклузивните принципи и работа со учениците со попреченост, како и ревидирање на улогата на стручната служба со јасна определба на нејзините стручно-педагошки надлежности.

Од владината прес-служба додаваат дека потребно е и креирање механизми кои ќе обезбедат гаранција дека сите ученици со попреченост кои се во инклузивно образование дека мора да бидат вклучени во задолжителните и изборните активности, како и во слободните активности во училиштето, како и да се обезбеди сигурност дека новата Концепција ќе рефлектира наставен процес чиј единствен центар на реализација ќе биде училиштето, односно со јасни норми ќе се ограничат обврските и задачите на учениците во рамки на семејството и домот, односно дури и при мала или делумна можност за тоа, целта на овие промени кои го нудат училиштето и активностите во него како фокус на образованието и воспитанието, ќе се девалвира.

– Националното координативно тело за имплементација на Конвенцијата на ООН за правата на лицата со попреченост при Владата, очекува брзо усвојување на Нацрт-концепцијата и практично креирање на сите акти кои произлегуваат од неа, во кои со задоволство ќе даде свој стручен придонес, се вели во соопштението.