На притворениот поранешен помошник министер во МВР, Ѓоко Поповски, утринава, пред да биде спроведен на продолжение од судското рочиште за случајот „Триста“, му се слошило.

Иако не се чувствувал добро, тој бил спроведен во скопскиот Кривичен суд на судење. Откако дозна дека на Поповски не му е добро, судијката Добрила Кацарска веднаш ѝ нареди на судската полиција да повика Итна помош. После 15-минутни прегледи, Поповски се врати на рочиштето.

Случајот „Триста“ на СЈО се однесува на набавка на 300 возила за потребите на Министерството за внатрешни работи. Според обвинението, со оваа набавка бил оштетен буџетот на државата за сума од 453.570 евра. Обвинет е Ѓоко Поповски, поранешен помошник-министер во Министерството за внатрешни работи.

Специјалното јавно обвинителство тврди дека Поповски тендерот за купување, сервисирање и за одржување на возилата им го доделил на фирми кои немале најевтина понуда.

Во овој случај судот ги прифати телефонските снимки од прислушуваните разговори како докази.