Кошаркарите на МЗТ Скопје по двата натпревари со Сутјеска и со Подгорица кои завршија со минимален пораз и триумф, настапот на третиот турнир во АБА2 лигата го завршија со лесен триумф над Војводина од 83:75.
Победата за „металците“ значеше и искачување на лидерската позиција на табелата со скор 8-2, барем до вечер кога Борац Бања Лука (8-1)  игра против Ловќен.
Кошаркарите на МЗТ Скопје слабо го започнаа натпреварот и му овозможија на противникот да поведе со 5:15. Но, како одминуваше времето, „металците“ играа се подобро и по првата четвртина имаа минус од само еден поен, 22:23.
Работите си дојдоа на место во втората четвртина, кога прво со поените на Милошевиќ, МЗТ Скопје поведе со 25:23 и до крајот на натпреварот не го испушти водството. Во 19 минута, по тројката на Кари „металците“ за прв пат имаа двоцифрена предност (50:39), додека на паузата разликата беше осум поени (52:44).
На стартот од третата четвртина, МЗТ Скопје направи серија од 7:0 и рутински го одработи натпреварот до крај, за осма победа во десетте кола во АБА2 лигата.
Рикиќ постигна 18 поени, а Војдан Стојановски и Милошевиќ дадоа по 15 поени за МЗТ Скопје, додека кај Војводина се истакна Беслац со 22 поени.