Монографијата „Македонската книжевна критика во 19 век“ е новата книга на д-р Славчо Ковилоски
Институтот за македонска литература ја објави монографијата „Македонската книжевна критика во 19 век“ од д-р Славчо Ковилоски. Книгата претставува своевидна историја за појавата и развојот на критиката во новата македонска книжевност и со неа се покажува развојот на македонската книжевна критика и книжевност во изминатите два века.
Во неа се презентирани педесетина автори со преку сто и педесет критичко-есеистички текстови што во иднина треба да заземат свое место во каноните на македонската литература. Без критичките одгласи од и за Теодосиј Синаитски, Партенија Зографски, Константин Миладинов, Григор Прличев, Трајко Китанчев, Крсте Мисирков и останатите македонски книжевници не би бил возможен развојот на македонската литература во 19 век, но и на македонската литература од 20 и 21 век, и во жанровска и во естетска смисла.
Притоа, се утврдува дека постоела македонска книжевна критичка мисла од ова време и се покажува дека таа во 20 век не е пројавена ад хок, како што беше презентирано од страна на некои книжевни критичари во минатото. Поради тоа, изготвена е соодветна периодизација и типологизација, а подетално се анализирани и одредени критички осврти кои своевремено ја бранувале тогашната јавност.
Според рецензентот проф. д-р Валентина Миронска-Христовска, книгата „претставува новина во македонската наука за литературна историја, а воедно и во македонската наука за литература и култура, воопшто. Со овој свој научен труд авторот Славчо Ковилоски пополни една празнина во нашата литературна историја, која е неопходна за проучувањето на развојот и на континуитетот на македонската литература, како и на науката за литературата и за културата, воопшто“.
(Текстот е објавен во „Културен печат“ број 169, во печатеното издание на весникот „Слободен печат“ на 4-5.3.2023)