Непознато лице, можеби поврзано со Улбрит или Силк Роуд, ги префрлило во една трансакција сите 70 илјади биткоини, вредни речиси милијарда американски долари, на друга биткоин адреса (паричник). Трансакцијата чинела 12 долари, а записот за неа останал на блокчејн. Оттаму и податокот за тоа дека овие биткоини се поврзуваат со Силк Роуд, што е доказ кој е дополнително засилен со фактот дека никој по гасењето на Црната мрежа не ги чепкал.

Засега не е познато кој е, како и зошто го преместил ова големо количество криптовалути, а од се не се исклучува ниту Улбрит. Тој е во затвор, но преку семејството кое управува со неговиот Твитер налог комуницира со јавноста. Ако за оваа трансакција не е одговорен тој или некој кој со него е поврзан, третата можност е да се работи за кражба, односно дека некој успеал да ја декриптира заштитата на паричникот  и така илегално се докопал до илегално заработените биткоини.

Дополнителен сомнеж на оваа активност фрла и фактот што се случи на самиот ден од американските претседателски избори. Значи, некој префрлил големо количество биткоини веројатно со надеж дека никој од медиумите и јавноста, преокупирани со политика, нема да забележи. Сега се очекува овие биткоини некој повторно да ги претвори во готовина, што би можело да даде дополнителни траги и информации за тоа кој има пристап до богатството на Улбрит.