Семејство на американски милијардери со седиште во Обединетото Кралство стана вирално откако објави оглас за дадилка на кучиња со полно работно време и плата од 127.227 долари или 117.282 евра годишно.

„Нашиот редовен клиент бара исклучителна и високо искусна дадилка за кучиња која ќе обезбеди врвна грижа за нивните две сакани кучиња“, стои во описот на работата на „ЛинкедИн“.
„Тие навистина бараат некој кој е на врвот во својот бизнис, кој може да обезбеди целокупна благосостојба, среќа и безбедност на кучињата“, додаваат тие.

Во огласот, објавен од агенцијата „Ферфакс и Кенсингтон“, се наведува дека избраната личност би живеела со семејство во лондонскиот кварт Најтсбриџ и „ќе треба да пружи исклучителна грижа и внимание на кучињата, третирајќи ги како ценети членови на семејството“.

Специјалистот за вработување Џорџ Дан изјави за „Кенеди њуз“ дека ова е прв пат агенцијата да објави работа за дадилка на кучиња, а откако бил објавен минатата недела, огласот веќе имал скоро 400 потенцијални апликанти.

„Платата е прилично неверојатна. Клиентите се милијардери кои ја бараат најдобрата услуга, па кога станува збор за нивните кучиња, тие со задоволство плаќаат. Кога парите не се проблем, луѓето го сакаат најдоброто, а вие го привлекувате најдоброто со најдобра плата“, изјавил Џорџ Дан.

Според огласот за работни места на веб-страницата за вработување, од дадилката ќе се бара да ги надгледува сите лекови на кучињата, транспортот на состаноци, како и да развие режим на вежби „користејќи техники за позитивна мотивација за одржување и подобрување на нивната обука“.

Секој потенцијален апликант треба да биде подготвен да „работи нередовни часови, вклучувајќи вечери, викенди и празници, за да ги задоволи потребите на кучињата и распоредот на семејството“.

Позицијата бара и кандидат кој има „способност да ракува со чувствителни информации со најголема дискреција и доверливост“.

Дан одби да ја открие расата на кучињата или идентитетот на семејството, додавајќи дека работата доаѓа со шестнеделен одмор, но тоа не е секогаш загарантирано.