Македонските познати личности се простуваат од Славиша Кајевски: „Каков удар сине, монструозен и подмолен шок…“
Откако одекна веста дека македонскиот актер Славиша Кајевски починал, неговите колеги и пријатели во шок, неверување и со тага се простуваат од актерот со срцепарателни објави на социјалните мрежи.
Утрово МНТ, матичната куќа на Славиша Кајевски, ја објави веста дека младиот актер трагично го загубил животот на 39-годишна возраст.
По објавувањето на трагичната вест, не престануваат да се нижат емотивните објави упатени кон починатиот актер.
Министерката за култура Ирена Стефоска се прости од Кајевски со зборовите:
„Славиша, израз на добрина и човечност, висока професионалност. Прекината е богата кариера. Остануваат впечатливи ликови кои секогаш ќе сјаат и ќе зборуваат за една голема актерска ѕвезда. Со длабока тага, изразувам сочувство до семејството, колегите, пријателите. Нека ти е светол патот, Славиша.“
Меѓу бројните колеги и јавни личности се Весна Петрушевска, Драган Спасов-Дац, Јелена Јованова, Кристина Арнаудова, Гаро Тавитјан, Елена Ристеска…
„Каков удар сине, монструозен и подмолен шок. За мене ќе бидеш мојот син Раде од Министерка, те сакам убавецу… одмори се и поздрави ги другарите“, напиша Весна на Фејсбук.