Македонската уметница Марија Павловска е добитник на престижната меѓународна награда „Пегаз“
Меѓународната награда за уметност „Пегаз“ (Pegasus for the Arts) ја доделува италијанската Фондација „Ефето арте“ (Effetto Arte) во Венеција. Уметнички директор на фондацијата е Сандро Сарадифалко, додека куратори се Салваторе Русо и Франческо Русо.
– Особена чест ми е што сум рангирана меѓу најдобрите. Благодарна сум на мојот неверојатен тим и семејство, неверојатни куратори, колеги и исклучителното раководство на „Мана контемпорари“ во САД (Mana Contemporary USA), каде што моето студио е повеќе од една деценија, произведувајќи ги моите најнови проекти и уметнички дела кои беа забележани и поканети да се прикажат на меѓународно ниво – истакнува Марија Павловска.
Свеченото доделување на наградата се одржало на 18 мај 2023 година во Палатата Скуола Гранде Ди Сан Теодоро – Венеција, во присуство на колекционери, новинари, политичари и љубители на уметноста.
Наградата „Пегаз“ е признание што им се доделува на сите оние уметници кои низ годините се истакнале со нивното уметничко истражување и со стилската вредност на нивните уметнички дела. Наградата е за уметници кои се достојни со нивните уметнички заслуги да бидат истакнати на меѓународно ниво. Делото на Марија Павловска е забележано и вклучено меѓу 50 избрани меѓународни современи уметници во кои треба да се инвестира.
– Оваа награда му ја посветувам на мојот покоен татко уметник Таки Павловски, кој почина истиот ден на церемонијата кога ми беше доделена наградата. Тој е важна фигура во мојот живот и една од причините што сум тоа што сум денес – посочува Павловска.