ЛШ: Челси или Реал Мадрид, кој ќе биде вториот патник за Истанбул?
Фудбалерите на Челси и Реал Мадрид денеска од 21.00 часот на „Стемфорд Бриџ“ во Лондон ќе го играат реванш натпреварот од полуфиналето во Лигата на шампионите.
Потсетување дека на првиот меч одигран во Мадрид двете екипи одиграа нерешено 1:1, резултат кој можеби повеќе му одговара на англискиот претставник, но Шпанците сигурно нема да се предадат и ќе се обидат да направат комплетен пресврт.
Првиот учесник во големото финале го дознавме вчера кога Манчестер сити го елиминираше ПСЖ и си обезбеди „билет“ за завршната битка за титулата на 29 мај во Истанбул, Турција.
– Предизвик е да се одржи интензитетот на играта во текот на целиот меч. Полуфиналето е голем притисок, мора да играме со многу самодоверба или во спротивно нема да имаме шанси против тим каков што е Реал – рече менаџерот на Челси, Томас Тухел.
Челси би требало да игра во изменет состав без Вернер: Менди, Кристенсен, Тијаго Силва, Ридигер, Азпиликуета, Жоржињо, Чилвел, Хаверц, Пулишиќ.
Тренерот на Реал, Зинедин Зидан имаше големи проблеми со повредите оваа сезона, но повторно неговите играчи се конкурентни на сите фронтови. Не може да смета на дефанзивецот Рафаел Варан, но затоа се враќа опоравениот капитен Серхио Рамос. Можен состав: Куртоа, Валверде, Рамос, Милитао, Марсело, Каземиро, Крос, Модриќ, Асенсио, Бензема, Винисиус.