Лео Меси прогласен за светска спортска ѕвезда во 2022 година
Фудбалерот на ПСЖ и аргентински репрезентативец Лионел Меси е прогласен за светска спортска ѕвезда за 2022 година во изборот на „Би-Би-Си“.
Меси ја освои титулата светски првак со репрезентацијата на Аргентина на неодамнешното Светско првенство во Катар.
Меси беше прогласен за најдобар играч на Мундијалот во Катар, а на овој Мундијал постигна седум гола. „Гаучосите“ по подобро изведување пенали ја победија Франција во финалето на Светското првенство.
„Би-Би-Си“ потсетува дека Меси кон другите трофеи ја додаде титулата светски првак, а најголем дел од нив во клупската кариера ги освојуваше со Барселона и ПСЖ.
Седум пати ја освојуваше „Златната топка“ за најдобар играч на годината. Со Барселона освои 35 трофеи и еден со ПСЖ. За аргентинската репрезентација одигра 172 натпревари и постигна 98 голови. Со репрезентацијата минатата година ја освои Копа Америка, а дојде и до златото на Олимпијадата во 2008 година.