Косовскиот премиер Албин Курти оцени дека преговорите меѓу Косово и Србија со посредство на ЕУ станале толку еднострани што влегле во ќорсокак и го обвини српскиот претседател Александар Вучиќ дека го навредува, а европските посредници дека не се обидуваат тоа да го спречат. Во денешното интервју за британски „Гардијан“, Курти рече дека континуираната нестабилност го направила регионот „игралиште за геополитичките игри на Руската Федерација и Народна Република Кина“.

Курти ја опиша својата последна неуспешна средба со српскиот претседател Александар Вучиќ на 14 септември во Брисел како дебакл, додавајќи дека специјалниот пратеник на ЕУ Мирослав Лајчак ја изгубил неутралноста. Според Курти, Лајчак не успеал да им ја пренесе на граѓаните на Косово писмената преговарачка позиција на Србија, туку таа им била презентирана дури откако преговорите биле прекинати.

Во интервјуто, косовскиот премиер го обвини Вучиќ дека го навредувал за време на разговорот, што, како што вели, станало редовна појава без никаков обид на посредниците да го спречат тоа.

Во овие две години доста често навредуваше и пцуеше на српски… Ги замолив посредниците да го спречат и да го осудат, но тоа никогаш не се случува“, рече Курти, но не прецизира кои „епитети“ наводно ги употребил српскиот претседател против него.

Гардијан“ наведува дека од избувнувањето на војната во Украина, Косово верува дека приоритетот е променет за да се осигура дека Србија нема дополнително да потпадне под руско влијание. Приштина тврди дека ЕУ и САД ги насочиле своите критики кон владата на Курти затоа што не основала асоцијација на општини со српско мнозинство со цел да им се даде поголема автономија на српските области, додека Курти одбива да се повлече без соодветни чекори од Србија, нагласувајќи дека ништо во однесувањето на Вучиќ сугерира дека може да му се верува.

Курти за „Гардијан“ вели дека на последната средба на 14 септември отишол со предлози за редоследот на чекорите на косовската и српската страна. Според него, Лајчак, претставникот на ЕУ, рекол дека предлозите нема да функционираат бидејќи се во спротивност со ставот на Србија, а кога косовскиот премиер побарал да го види документот со ставот на Србија, Лајчак рекол дека му бил даден на заменикот на Курти пред средбата, но заменикот го негирал тоа.

Според Курти, се покажало дека документот што недостасува Србија го составила уште пред мартовскиот договор и дека во него останува на ставот дека нема напредок додека Курти не ја формира Заедницата на српските општини, а Лајчак несомнено ги прифатил српските услови.

Главниот портпарол на ЕУ за надворешни работи рече дека извештајот на Курти „не ја одразува вистината и е неточен“. Тој рече дека 27-те земји-членки ја повториле својата целосна поддршка за дијалогот, за Борел, кој ги води разговорите и за Лајчак. Тој го критикуваше Курти за кршење на доверливоста на дијалогот.