Кандидатката на ВМРО-ДПМНЕ за градоначалничка на Општина Центар, Наташа Котлар-Трајкова, во вечерашната дебата на телевизијата Канал 5, на која гостува и нејзиниот противкандидат од СДСМ, Горан Герасимовски, изјави дека се залага за ревизија на деталните урбанистички планови во општината.

– Колку што ми е познато мене, од 31 ДУП, само четири се ревидирани. Постоеше една амбициозна, да речам програма, којашто требаше да биде во насока на оној термин – мораториум, меѓутоа бидејќи тоа не е уставно, одеа како што одеа работите. Мислам дека треба да се ревидираат сите ДУП-ови, мислам дека последниот што го прочитав податок беа 22 ДУП-а и 11 елаборати во однос на ситуацијата со Холидеј Ин. Мислам дека овдека треба да се интервенира, затоа што проблемите кај нас се и во Законот за градежништво и Законот за урбанистичко планирање, значи сите аномалии ни се во тоа, рече Котлар-Трајкова.

Таа додаде дека треба сериозно да се интервенира во урбанистичките планови.

– Наводно Општината изготви 11 елаборати, меѓутоа добија одговор од страна на министерството дека тоа не се прифаќа и се даде пас да се градат тие две станбени згради од 20 ката и една деловна од 16 ката. Меѓутоа тоа е една играрија, бидејќи знаеме дека можеби е намерна грешка, наместо да се повикаат на определен член во одбраната на тие ДУП-ови одеа по погрешен член 35. Колку што знам и ДКСК во врска со овој проблем веќе поднесе иницијатива до Обвинителството. Ќе ве молам, јавен интерес мора да биде и фактот дека некој девет пати ви го зголемува бројот на населението на определен простор и тоа создава проблеми во инфраструктурата, образовна, социјална, рече Котлар-Трајкова.