Костадиновска-Стојчевска: Скопје мора да доживее ослободување од стиропорот и невкусот на „Скопје 2014“
Во 2023 година ќе се одбележуваат 60 години од катастрофалниот земјотрес во Скопје, а министерката за култура, Бисера Костадиновска-Стојчевска најави дека „на 60-годишнината Скопје мора да доживее т.н. ослободување од стиропорот и невкусот на Скопје 2014-та”.
– Скопје е нашата престолнина со која претендираме да станеме европска престолнина на културата во 2028 година…, рече министерката за култура на денешната панел дискусија на конференција „Година на нови можности“ .
На панелот таа посочи и дека вработените во културата имаат достоинствени плати.
– Пред една година кажав дека фокусот на мојот мандат е инвестирање во живата култура. Верувам дека најдобитната комбинација е капитални инвестиции, но и инвестирање во човечкиот капитал кои мора да одат чекор во чекор, рече Костадиновска-Стојчевска на панелот „Капитални и инфраструктурни проекти за подобар квалитет на живот и развој на културата во услови на криза”.
Таа соопшти дека во оваа година ќе бидат одбележани неколку јубилеи: еден век од раѓањето на Ацо Шопов, што ќе почне на 21 март во седиштето на УНЕСКО во Париз, 120 години од Илинденско востание, од смртта на Гоце Делчев и Питу Гули, од објавувањето на „За македонските работи” на Крсте Мисирков и 70 години од формирањето на Институтот за македонски јазик кој го носи неговото име…