Претседателот на Хондурас, Хуан Орландо Хернандез е заразен со коронавирусот, прима терапија и ќе работи од дома со помош на соработник, било соопштено од неговиот кабинет.

„Како претседател на нацијата и одговорен граѓанин сакам да кажам дека за време на неделава почнав лошо да се чувствувам и денес сум дијагностициран со вирусот Ковид-19“, рекол Хернандез за време на телевизиското обраќање на нацијата, пренесува Ројтерс.

Според неговите зборови, тој има благи симптоми и од примената терапија веќе се чувствува подобро, но ќе остане во изолација до одлуката на лекарот.

Како што додал, тој прима коктел на лекови меѓу кои се микродацин, азитромицин, ивермектин и цинк. Се додава дека со вирусот се заразени и неговата сопруга и двајца соработници.