Кирил Петков поднесе оставка, Радев почна консултации за нов мандатар
Бугарскиот премиер Кирил Петков ја поднесе оставката на кабинетот до Народното собрание. Документот го доставил преку курир. Минатата недела владата беше соборена со изгласување недоверба за што барање беше поднесено од ГЕРБ-УДФ и беше поддржано од МРФ, Преродба и „Има таков народ“. Ова дојде по расколот во владејачката коалиција и заминувањето на „Има таков народ“.
Владата на Кирил Петков е на власт нешто повеќе од половина година.
Во меѓувреме, бугарскиот претседател Румен Радев денеска ги започна консултациите со претставниците на пратеничките групи во 47. Народно собрание за доделување на мандатот за формирање нова влада во рамките на актуелниот парламент. Претседатеот Радев денеска и утре ќе има консултации со пратеничките групи.
Доколку „Продолжуваме со промената“ не успее да формира нова влада, според уставот мандатот оди кај втората политичка сила ГЕРБ, која веќе најави дека ќе го врати и нема да води разговори за коалицирање.
Ако ни третата партија не успее да формира влада, Румен Радев мора да го распушти Националното собрание, да назначи преодна влада и да закаже предвремени парламентарни избори.