Осмиот тенисер во светот Каспер Руд денеска се пласираше во четвртфиналето на „Ролан Гарос“. Норвежанецот во осминафиналната фаза го совлада Полјакот Хуберт Хуркач со 3:1 во сетови и го забележа најдобриот резултат во кариерата на вториот Грен слем сезонава.

По сетови беше 6:2, 6:3, 3:6, 6:3 за 23-годишниот Руд за нешто повеќе од два и пол часа тенис на теренот на „Сузан Ленглен“. Следен противник на Руд ќе биде подобриот од дуелот помеѓу Стефанос Циципас (Грција) и Холгер Руне (Данска).

Ова е првпат во кариерата Руд да се пласира меѓу најдобрите осум играчи на Грен слем – тој е во серија од осум победи, а славеше на 11 од претходните 12 мечеви.

Клучно за победата на Норвежанецот беше фактот што имаше точно 20 неизнудени грешки помалку. Во првиот сет три пати му го одзеде сервисот на Хуркач (еднаш го загуби својот), а во вториот забележа само еден брејк – при сервис на Полјакот и водство на Руд од 1:0.

Во третиот сет Хуркач, 13. играч на планетата, се стабилизираше, сигурно добиваше гемови во кои го изведуваше почетниот удар, а во четвртиот, по голема борба, Руд ја искористи втората меч топка во деветтиот гем, прва на свој сервис.

Во женска конкуренција во четвртфиналето се пласираше Русинката Дарија Касаткина која двапати со 6:2 ја елиминираше Камила Џорџи (Италија).

Касаткина за пласман во полуфиналето ќе игра против нејзината сонародничка Вероника Кудерметова која со 2:1 (1:6, 6:3, 6:1) триумфираше над Американката Медисон Кијз.