Настрадин Оџа и Итар Пејо слушнале дека пишував за нив во претходната колумна и дека сум ги вселил во Охрид. Пуштиле абер, сакале да ме видат на кафе. Дојди ми рекоа во 9 наутро, во Аквариус, ден после езерскиот пазарен ден. И самата покана од двајцата итреци беше завиткана во мала загатка.

Дојди после езерскиот пазарен ден?!? Езерото има еден град и две гратчиња, значи три града, значи три пазарни езерски деној. Сите знаеме дека пазарен ден во гратчето Струга е сабота, во гратчето Поградец е во недела а во Охрид е во понеделник. За да сум сигурен дека ќе ги најдам, бев и во недела и понеделник, но ги најдов во вторникот. Се поздравивме, и тие си продолжија со својот муабет, оставајќи ме да ги слушам.

Пејо- Настрадине, до каде сте со минарето?

Настрадин- некни едни момци ми рекоа дека убо сме ја изградиле, изгледала многу секси. Ме прашаа некни едни турски туристи каде е Плаошник, јас не знаев, ги пуштив за Имарет. Заминаа, и ги слушав кај што ме оговараат и гласно се смеат. А вие Пејо, со Имарет, до каде сте?

Пејо- Заплавено е Настрадине, како Плаошник. Богословскиот факултет веќе започна со уписи, но ми кажаа дека невакцинирани студенти нема да примаат.

Настрадин- Вакцинирани против што бе Пејо?

Пејо- против нео-османизам, слушнав се ширел како морбили. Охрид е балкански Ерусалим, не си чул?

Настрадин- Јас мислев дека Солун е балкански Ерусалим, таму имаше евреи и синагоги.

Пејо- А тебе Настрадине што ти смета Охрид да биде балкански Ерусалим? Што ги мешаш сега Солун и евреите?

Настрадин- Јас не ги мешам, тие веќе Охрид си биле и Солун си биле и се измешале. Си чул ли за Јудах бен Москони, познатиот охридски евреин?

Пејо- е како не сум чул, има негов споменик во Охрид, само што не е уште изграден, и на него пишува.  Јудах Леон бен Мозес Москони, роден во Охрид во 1328, познат талмудист кој патувал низ сите три стари континенти. Му бил ученик на Шемариах Елајџа ал-Икрити. Во Египет му бил ученик на Обадиах Мизри кој му бил душевен татко. Потоа бил во Мароко, Италија и Франција, каде што се дружел со Мозес Нарбони и Давид Бонгорон. Љубел филозофија која ја читал на хибру и на арапски, но бил заинтересиран и за метафизиката, па учел од коментарите на Ибн Езра. Не гледаш ли колку еврејски туристи доаѓаат да го посетат неговиот споменик во Охрид , и тоа уште неизграден? Што мислиш ти Настрадине, ние во мариово немаме интернет и гугл?

Настрадин- Го гледам споменикот на Јудах бен Москони, како не го гледам. Ти не прочита на него дека пишува дека го преведувал и Маимонидес, коментирал врз Хипокрит и Аверо? И мислел дека граматиката е многу важна и го иритирале сите кои ја занемарувале. Пејо, извини, како се вели граматички точно, Ирак или Иран?

Пејо- најточно е Плаошник, а ти можеш аку сакаш да си правиш граматички инает, и да ги упатуваш турските туристи каде сакаш, тие и Имарет да тргнат, Плаошник ќе стигнат, а ти ако сакаш, можеш да им даваш правец од минарето на Али Пашината џамија.

Настрадин- Тој споменикот на Јудах бен Москони да не е до Хаџи Кас`м џамијата на Плоштад?

Пејо- Не е, туку е одма до црквата Св.Димитрија на Плоштад, нели сега нам ни е редот. Вие си изградивте секси минаре, сега ние ќе изградиме уште посекси црква на плоштад, и после ви е редот вам…и така во недоглед, дур не го изградиме  балканскиот Ерусалим, сосе зидот на плачот, сосе наоружани полицајци и самораспрснувачки лам-пиони.

Сакав да продолжам, но реков да пишувам после кафето….