Јорданскиот крал Абдула Втори денеска на средба со американскиот државен секретар Ентони Блинкен во Аман повика САД да извршат притисок врз Израел да воспостави „итен прекин на огнот“ во Газа. Во исто време, тој предупреди на „катастрофални последици“; продолжување на непријателствата.

Блинкен синоќа пристигна во главниот град Аман како дел од новата турнеја на Блискиот Исток во обид да го избегне ширењето на конфликтот и да спречи „бесконечен циклус на насилство“, објави Франс прес.

Во соопштението од кралската палата, кралот на Јордан исто така ја нагласи потребата да се стави крај на „трагичната хуманитарна криза во Појасот Газа“.

Тој потврди дека „регионот нема да постигне стабилност без праведно решение за палестинското прашање и без постигнување праведен и сеопфатен мир заснован на решение со две држави“, односно постоење на две држави – Палестина и Израел.

Кралот, исто така, повтори дека „Јордан целосно го отфрла присилното раселување на Палестинците и обидите да се оддели Газа од Западниот Брег“, две територии за кои рече дека се составен дел на идната палестинска држава.

Покрај тоа, тој ги осуди „актите на насилство од (еврејските) доселеници врз Палестинците и насилството на муслиманските и христијанските свети места во Ерусалим, предупредувајќи на опасност од „експлозија во регионот“.

Блинкен потврди во саботата вечерта, по состанокот на Крит со грчкиот премиер Киријакос Мицотакис, дека „важно е да се осигура дека конфликтот нема да се прошири“.

„Сакаме да се погрижиме земјите истомисленици да ги користат нивните врски, нивното влијание, нивните односи со некои од актерите кои би можеле да бидат вклучени за да ги контролираат работите за да се осигураме дека конфликтот нема да се прошири“, рече американскиот државен секретар, особено истакнувајќи ја клучната улога што Турција може да ја игра по разговорите во сабота во Истанбул со претседателот на земјата, Реџеп Таип Ердоган.

По Јордан, Блинкен патува во Катар, земјата која посредуваше за седумдневно примирје во војната, на крајот на ноември.

Тој потоа ќе го посети Абу Даби пред да пристигне во Саудиска Арабија во понеделник, а потоа и во Израел каде, како што призна, ќе има разговори кои нема да бидат лесни.