Булевар „Босна и Херцеговина” влегува во завршна фаза од изградбата и се очекува следната недела да биде пуштен во употреба, информираат од Град Скопје.

Оттаму истакнуваат дека новопроектираниот булевар „Босна и Херцеговина”, од улица со две ленти прерасна во современо булеварско решение со шест сообраќајни ленти и комплетна инфраструктура.

– Во текот на следната седмица се очекува да биде целосно завршен и пуштен во употреба. Со тоа Скопје добива целосно нов булевар со вкупна должина од околу 1700 метри, ширина од 40 метри, со шест коловозни ленти, пешачки и велосипедски патеки од двете страни, а предвидено е и средишно и странично зеленило со прекрасни дрвореди од двете страни и ново улично осветлување, по целата должина од булеварот „Словенија” до булеварот „Христијан Тодоровски Карпош”, велат од Град Скопје.

Оттаму нагласуваат дека булеварот „Босна и Херцеговина” е дел од секундарниот северен прстен и како таков претставува важна и исклучително фреквентна сообраќајница во овој дел од градот.

Булеварот се протега од крстосницата со улицата „Македонско-косовска бригада” до крстосницата со булеварот „Христијан Тодоровски Карпош”. Заедно со булевар „Словенија” ги поврзува граѓаните на општините Шуто Оризари, Карпош, Чаир, Бутел и Железара со преостанатиот дел од градот, додека со булеварот „Христијан Тодоровски Карпош” претставува брз излез на скопската обиколница.