Издавачката куќа „Или-или“ го објави романот „Сѐ уште можам нешто да сторам“ од Фросина Пармаковска
Новиот роман на писателката Фросина Пармаковска со наслов „Сѐ уште можам нешто да сторам“ е објавен како книга бр. 226 во едицијата „ПРОаЗА“ на издавачката куќа „Или-или“.
Станува збор за роман за денешнината, за реалноста која е таква каква што ја гледаме, таква каква што ја живееме со сите недостатоци, предизвици и последици од стапиците што ни ги носи современото живеење. Како и во претходните романи на Пармаковска, и тука се доминантни психологизацијата на главнот и останатите ликови од една страна, но и личните подеми, падови и резултирачкиот раст, созревање на главниот лик, од друга страна.
– Ова е роман за суштинската промена одвнатре, промена која настапува како резултат на силни и длабоки потреси, искрени соочувања со Себеси, долги разговори во себе низ бројни непроспиени ноќи, роман за чудесното, соништата и постојаното поместување на границата помеѓу тие два света: реалното и чудесното – посочуваат од „Или-или“.
Писателката Фросина Пармаковска е родена во Скопје во 1985 година. Дипломирала на Филолошкиот факултет, катедра за Општа и компаративна книжевност при УКИМ во Скопје. Магистрирала на Институтот за македонска литература, на „Културолошки студии“.
Авторка е на романите: „Пишувајќи ги изгубените топки“, „Вишнова хроника“, „Одбројување“ (роман на годината за 2017 г.) и „На враќање“.
(Текстот е објавен во „Културен печат“ број 211, во печатеното издание на весникот „Слободен печат“ на 30.12.2023 – 02.01.2024)